ILIGAN CITY (PIA)–Pito ka mga buros gikan sa clustered barangays dinhi sa dakbayan ang nagpakita sa ilang katahom ug panglawas sa ilang pagtigi alang sa titulo nga “Healthy Buntis 2023.”
Ang pageant subay sa selebrasyon sa Family Month, nga nagpromotar sa maayong panglawas sa mga inahan.
Gipangulohan kini sa City Health Office, Department of Health Region 10, Commission on Population and Development Region 10, Zuellig Family Foundation, The Challenge Initiative, Johns Hopkins Bloomberg School of Public Health, ug uban pang stakeholders.
“Ang Healthy Buntis pageant 2023, it means maski buntis ka you can really be healthy, you must be having positive sexual behavior because becoming pregnant is the most important for a mother, especially sa babae,” ingon ni Dr. Ardel Padayhag, medical coordinator sa Human Immunodeficiency Ang Virus (HIV), Acquired Immunodeficiency Syndrome ug Sexually Transmitted Infection (STI) sa Prevention Control Program sa City Health Office.
Gibida sa mga buntis ang ilang kaanyag sa production number ug sa long gown segment, gisundan sa question and answer portion.
“Overwhelming kaayo, wala ko nag-expect na ako diay makadaog. Kaning pageant dili lang siya about pagwapahay platform pud ni siya para ma-shwocase ug mu-shine ug makashare og stories nga maka-inspire sa mga mama,” ingon ni Maria Bernadette Gooc gikan sa Barangay Kiwalan nga gikoronahan isip Healthy Buntis 2023
Aduna sab gipahigayon nga awareness bahin sa teenage pregnancy, family planning, HIV, ug STI. (LELA/PIA-10/Lanao del Norte)
